Qaar ka Mid ah Ardayda Somaalida ee Deeqda Waxbarasho ka Helay Turkiga oo u Baxsaday Dalal ka Tirsan Yurub

Arday tiradoodu tahay boqollaal qof oo ka kala tegay Somaliland iyo Soomaaliya oo toddobaadkii hore waddanka Turkiga u tegay deeq waxbarasho heer  jaamacadeed ah, ayaa waxa soo baxaya warar sheegaya in qaar ka mid ah ardaydaasi ka baxsadeen goobaha laga dejiyey caasimadda dalkaas ee Istanbul, una baxsadeen dalalka Yurub ee deriska la ah Turkiga. Sidaana waxa xaqiijiyey xubno ka mid ah ardaydaas oo khadka telefoonka kula soo xidhiidhay eheladooda oo jooga magaalada Muqdisho.

Sida xalay lagu baahiyey qaar ka mid ah warbaahinta Muqdisho, gaar ahan bogga wararka ee Dayniile.com.Mr. Cabdiraxmaan Axmed oo ka mid ah ardayda Soomaalida ee ku sugan magaalada Istanbul, ayaa sheegay in shan ardaydooda ka mid ah oo laba saaxiibbadii yihiin laga waayey goobta la dejiyey, kuwaas oo uu xusay inay u tallaabeen

Mid ka mid ah ardayda baxsatay ayaa la sheegay inuu gaadhay, iskana dhiibay dalka Holland, siday caddeeyeen eheladiisa oo jooga magaalada Muqdisho, halka qaar kalena la rumaysan yahay inay weli ku jiraan safarka tahriibka ah ee ay kaga baxsadeen goobaha dawladda Turkigu dejisay.

Ardayda baxsaday ayaa la sheegay in aanay markii horeba ujeeddadoodu ahayn ka faa’iidaysiga fursadda deeqda waxbarasho ee dawladda Turkigu u fidisay, balse u baxeen oo keliya sidii ay heli lahaayeen fursad u suurtogelisa gaadhista waddamada Yurub ee Soomaalidu sida weyn ugu hammiyaan tegistooda, waxaanay wararku tibaaxeen in qaar ka mid ah waalidiinta ardaydaasi ogaayeen qorshaha u qarsoonaa ubadkooda, sidoo kalena isla markiiba ku xidheen carruurtooda mukhalasiin Soomaali ah oo ka ganacsada tahriibta dhallinyarada doonaya inay si sharci-darro ah isaga kala gudbaan dalalka Yurub.

Ma jiro ilaa hadda wax war ah ku saabsan arrintan oo ka soo baxay dawladda Turkiga, lamana sheegin wax tallaabooyin ah oo ka qaadday baadi-goobka ardayda dalkeedu waxbarashada ugu deeqay ee ka baxsaday goobaha laga dejiyey caasimadda Istanbul.

Dhinaca kale, waxay wararku intaa ku dareen inay jiraan qaar badan oo ka mid ah ardaydaas oo ku fekeraya qorshe ay ugu baxsadaan dalalka qaaradda Yurub.

Xigasho: Jamhuuriya