Toloow, Djibouti ma noqon doontaa halkii Somaliland iyo Somalia ay si milgo iyo xurmo leh ugu kala baxayeen, Djibouti-na doorkeeda ma ka qaadan doontaa arintaa ? Wyl-News
- Madaxweyne Ismaaciil Cumar Geelle, ayaa markii ugu horreysay
madaarka diyaaradaha ee magaalada Jabuuti ku qaabilay Madaxweynaha Somaliland
Md. Axmed Maxamed Maxamuud (Siilaanyo) iyo wefti uu horkacayo oo gelinkii dambe
ee shalay gaadhay dalkaas oo uu kaga qaybgalayo munaasibad xukuumadda
Jamhuuriyadda Jabuuti u samaynayso xuska 40-guurada ka soo wareegtay markii la
qoray Afsoomaaliga.
Madaxweynaha Somaliland iyo weftigiisa oo ay ka mid yihiin wasiirradiisa
Arrimaha Dibadda, Madaxtooyada, Waxbarashada iyo marwada 1aad waxa la dejiyey
hudheelka Kambiski oo ku yaal caasimadda Jabuuti, halkaas oo casho-sharaf loogu
sameeyey xalay.
Madaxweyne Siilaanyo oo shalay saxaafadda ugu warramay qolka nasashada
Madaarka Egal ee Hargeysa, waxa uu sheegay inuu martiqaad rasmi ah ka helay
Madaxweynaha Jabuuti, isla markaana ka qaybgeli doonaan xuska 40-guurada
qoristii afka Soomaaliga.
“Aniga iyo weftiga ila socdaa waxaannu tegaynaa dalka Jabuuti, annagoo
martiqaad ka helay Madaxweynaha Jabuuti Md. Ismaaciil Cumar Geelle. Waxaannu
kaga qaybgalaynaa xuska 40-guurada ka soo wareegtay qoristii far Soomaaliga,
markaa shirkaas ayaannu ka qaybgalaynaa, waanuna madaxda Jabuuti ka wadahadli
doonnaa wixii daño ah ee labada dal ee jaarka ah ka dhexeeya,” ayuu yidhi
Madaxweyne Siilaanyo.
Dhinaca kale, Madaxweynaha Soomaaliya Mr. Xasan Sheekh Maxamuud oo ka mid ah
madaxda ka qaybgalaya xuska munaasibadda qorista Afsoomaaliga, ayaa isaguna
gaadhay isla shalay dalka Jabuuti, iyadoo la filayo inay markii ugu horreysay
halkaas isku arkaan Madaxweynaha Somaliland iyo wefti uu horkacayo oo iyaguna ku
sugan Jabuuti.
Xigasho: Jamhuuriya
No comments:
Post a Comment