- Wasiirka Arrimaha Dibadda Somaliland Dr Maxamed C/laahi Cumar ayaa sheegay inay
cunaqabaynta hubka ee Somalia laga qaaday ay khatar baaxadleh ku keeni karto
dalalka Mandaqada iyo caam ahaan Nabadgalyada Dunida, kaas oo wax laga xumaado
ku tilmaamay talaabada Golaha Amaanku hubka ugu fasaxay dawladda
Somalia.
Dr Maxamed C/laahi waxa uu sidaas ku sheegay Waraysi
Khaas ah uu Wargeyska Haatuf khadka telefoonka ku siiyey isaga oo
ku sugan Magaaladda Adis-ababa ee xarunta dalka Ethiopia intii aanay xalay u
duulin dalka Turkiga oo isaga iyo Wafti Wasiiro ah oo uu hogaaminayaa ku
tagayeen socdaal shaqo. Wasiirka Khaarajiga Somaliland Maxamed C/laahi Cumar
waxa sidoo kale tilmaamay in cunaqabaynta hubka ee Somalia laga qaaday ay fursad
siinayso kooxaha Xagjirka ah oo uu tibaaxay in hub culus ay suurta gal tahay
inuu gacantooda galo, isla markaana ay khatar galiyaan Nabadgalyada guud ee
Mandaqadan.
Sidoo kale Wasiir Maxamed waxa uu deedefeeyey faro-galinta dawladda
Somalia ku wado Dacwada gacan ku dhiigle Cali Samater oo xasuuq ba’an iyo gumaad
u gaystey bulshadda Somaliland, kaas oo xusay in talaabadaasi waxyeelo u
gaysanayso wada-hadaladii u socday Somaliland iyo Somalia, kaas oo ugu baaqay
xukuumadda Muqdisho inay ka waan-towdo inay siyaasadayso dacwada Cali Samater
kaga socota dalka Maraykanka.
Ugu horayna isaga oo ka hadlaya ujeedada socdaalka ay
dalka Turkiga ku tagayaan isaga iyo Wasiirada Waxbarashada iyo Macdanta iyo
Biyaha Somaliland, waxa uu yidhi “Waxaanu m ardhaw u duulaynaa dalka Turkiga
aniga iyo wafti aan hogaaminayaa oo ay ka mid yihiin Wasiiradda Waxbarashada iyo
Macdanta iyo Biyaha, waxaananu halkaas u tagaynaa oo aanu kala hadlaynaa arimaha
Mashaariicda horumarinta Turkigu Somaliland ka fulinayo iyo meelaha aanu
jecelnahay in xukuumadda Turkigu ay naga taageerto, hadii wakhti ku haboon isla
helno inay kulmaan Raysal Wasaaraha Turkiga iyo Madaxwaynaha Somaliland-na
dhakhso ayaanu hawsheeda u gali doonaa oo aanu ka shaqayn doonaa”.
Wasiirka
Khaarajigu mar uu ka hadlayey Mawqifka xukuumadda Somaliland ee Cunaqabaynta
hubka ee laga qaaday Somalia, waxa uu yidhi “Cunaqabatayntii dhinaca hubka
khaasatan hubka fudud ee imika mudada sanadka ah laga qaaday dawladda Muqdisho
ee Somalia waxaanu u aragnaa arin lagu degdegay inay tahay oo aan si wanaagsan
looga fiirsanin, isla markaana waa arin Nabadgalyada Geeska Afrika waxyeeli
karta, xataa waa arin amniga Somalia gudaheeda waxyeelaysa oo Somalia imika
waxay u kala jajabeen gobolo ay hogaaminayaan badankooda hogaamiye kooxeedyo oo
awood ay meel Muqdisho ka baxsan dawladda Somalia ku leedahay ma jirto, markaa
cunaqabayntaas hubka ee laga qaaday Somalia waxay xataa waxyeelaysaa amniga
gudaha Somalia iyo inay waxyeelayso oo lagu waxyeeleeyo Nabadgalyada dalalka
mandaqada oo ay Somaliland-na ka mid tahay.
Markaa arinta Cunaqabaynta ee Somalia waxay keeni kartaa
khatar ah in hub culus uu gacanta u galo kooxaha Xagjirka ah oo markaa khatar
galin kara Geeska Afrika oo dhan maadaama oo Somalia aanay lahayn dawlad adag oo
awood u leh inay dalkeeda maamusho oo aan lahayn ciidan habaysan oo hanan kara
dalkooda”. Isaga oo hadalkiisa sii watana, waxa uu yidhi “Imika waxa hubka fudud
loo fasaxay Somalia mudo sanad ah oo waliba Tijaabo ah, waxaana la filayaa in
shirar arintaas ku saabsan ay iskugu yimaadaan dhawaan dalalka Mandaqadan oo
khatar badan ay arintaasi ku keeni karto”.
Wasiirka Arrimaha Dibadda Somaliland
Dr Maxamed C/laahi Cumar mar uu ka hadlay faro-galinta dawladda Somalia ee
dacwada Cali Samater kaga socota dalka Maraykanka, waxa uu yidhi “Arinta ay
Somalia ku faro-galinayso dacwada Cali Samater waa arin nasiib daro ah oo
muujinaysa muumulka Muqdisho ka jira aanu aqoosanayn ama uu dafirsan yahay
Xasuuqii lagu sameeyey Ummadda Somaliland ee aduunyadu wada ogayd sidii uu Cali
Samater u xasuuqay bulshadda, waxaanan xukuumad ahaan iyo shacbi ahaanba u
aragnaa arintaasi inay tahay Nabarkii loo gaystey bulshada oo la damqayo marka
la difaaco mid ka mid ah ragii sida xun u gumaaday ummadda Somaliland.
Waxaanannu leenahay arintaasi dacwada ha loo daayo Maxkamadaha ay ka socoto oo
yaan la siyaasadaynin ayaanu leenahay oo yaan dawlad kale aanay dawladda
Maraykanku u maqlin”.
Dr Maxamed C/laahi Cumar mar uu ka hadlayey faro-galinta
dawladda Somalia ee dacwada Cali Samater kaga socota dalka Maraykanka, waxa uu
yidhi “Faro-galinta Dacwada Cali Samater waxay waxyeeli kartaa wada-hadaladii la
filayey inay dhexmaraan Somaliland iyo Somalia, waxaananu dawladda cusub ee
Muqdisho ugu baaqaynaa inay ka waantowdo faro-galinta Kiiska Cali Samater”.
“Hadalka la sheegay inuu ka soo yeedhay Raysal Wasaaraha Somalia ee uu yidhi
hadii Mid-nimadii Somalia ay wada-hadal ku iman waydo inay isku dayi doonaan
inay xoog ama awood ciidan ay ku faro-galin doonaan Somaliland, waxaanu leenahay
dawlad Masuuliyiinteedii ugu saraysay ay sidaas u hadlaysaa waa khalad wayn oo
la galay in laga qaado cunaqabatayntii hubka, waxaananu u aragnaa arin hurinaysa
Colaad cusub oo geeska Afrika ka dhalata”.
Xigasho: Haatuf
No comments:
Post a Comment