Gaarriye Muu Dhiman Ee Ummad dhan baa goblantey

Guuloow alahyoow
Geesigii wad baa helay
Geeridu xaq weeyee
Kuwa gala halka u roon
Garab gala Rasuul kii
Xuurar cayn ta gurigiyo
Garab jog to raaxadu
Naxariista guud kiyo
God ka  raaxo uuga yeel
kuwa aan gaboobayn
Gidigood dhalaan ka ah
Kuwa gala hadh kaagee
ku gama,aya raaxada.

                                              W/t; Cabdul-Khaaliq Maxamed

 

- Xilli ku beegnayd  dhinacayaga 12:30 habeenimo ayaan dhigay telefoonka.Waxaanu falanqaynaynay sidaanu ugu hawl galayno xuska Maalinta Mujaahidiinta oo inagu soo  fool leh.Waxaanu  istaabsiinay geerida naxdinta leh ee ku timid  Faysal Cumar Mushteeg (IHUN) iyo sidaan looga faa’iidaysan waayo-aragnimadiisii aqooneed, macalinimo, xanaaneyntii xoolaha,kobcintii fanka,iwm.

 

Aroornimadii ayaa markaan sii shaqotagayey iyadoon dhaqan ii aheyn la i tusay inaan bal eego wararkii dalka.Indhahaygaa ka soo booday,isdiidsiiyey xaqiiqada qoraalada ku xardhan, laakiin  mareeg walba waxaa buuxiyey bogga hore tacsidiisa.Waa sheegista Geeridii Abwaan,aqoonyahan, macalin,dhaqan dhawre, Af kobciye, Waayeel,  hagarlaawe Maxamed Xaashi Dhamac “Gaarriye”.

 

Yoonis Cali Nuur oo ka hadlaya  Gaarriye (IHUN) ayaa laga hayaa “Gaarriye waxa uu ahaa nin aqoonyahan ah, wax weyna ku soo kordhiyey suugaanta Soomaalida. Gaar ahaan waxan xasuusnahay hawshii weyneyd ee uu ka soo qabtay daraasooyinkii iyo cilmi-baadhistii miisaanka maansada sannadihii toddobaataneeyadii, waxaanu ahaa qofkii ugu horreeyey ee sameeya baadhitaankaasi, dejiyeyna xeerarka miisaanka tixda”.

 

Nafteydaan u sheegay inay geeridu xaq tahay,waxaanse dareemay hagardaamada ka imaneysaa goobihii baylahsanaa ee uu itaalkiisa jufayn jiray.Waxaan xasuustey erayadii uu ka jeedin jiray markuu  qof bulshada waxtare u ahaa  la kulmo geerida: “Af walba inta uu   dadkiisu qabsado ayuu bani’aadamka ka erayo badan yahay, haddii ummadi waxba qabsani waydo fikiri waydo waxba soo saari waydo Afkeeduna wuu gudhaa.... Marka oday dhintaba Libarary baa gubta ,library dhaqankiina ah ayaa gubta........”

 

Waxaan iswaydiiyey intuu noolaa maxaa loo taray,warcelinteedii way adkaatey,garteyna bulshadaan ka dhashay inaaney hawshaa u igmaneyn.Waxaan ka dib  iswaydiiyey maxaa laga reebay ee hanti idiin noqday.Waxaana maankayga ku soo dhacey saddexda buug ee Hagarlaawe,Mahadhadii Gaariye iyo biography of Gaarriye.Waxaan booqday qolka kaydka ee mareegta Farshaxan waxaan arkay qoraalo badan oo ku saabsan isaga,maqal iyo muuqaal  dhawr ah, maqal maansooyinkiisii oo tiro leh, iwm.

 

Mareegta farshaxan waxay Ilaahay uga baryeysaa inuu abwaanka hoy lagu waaro uga dhigo Jannatu Fardawsa,eheladii, iyo dhamaan bulshada ku hadasha Af-Soomaliga, inta xiisaysa  u doodida dulmanaha ee aduunkoo dhan,  samir iyo iimaan ka siiyo.

 

Qoraalo dhameystiran oo ku saabsan abwaanka ayaa hawsheedii ay ku jirtaa mareegtu. Insha Allah sidii hab-dhaqanka mareegtu ahaa waanu idinla wadaagi doonaa.Waxaanan ku soo af-meerinayaa qoraalkan kooban maanso uu tiriyey aqoonyahan Bashiir Good oo uu nala wadaagey ahan baroordiiq uu u curiyey Abwaan Gaarriye(IHUN):

 

Wuxuu Yidhi:

 

Abiidaba nin loo go’o

Oo lagu galaashiyo

Geesigu ma waaree

 

*****

Gaarriye hadduu tegay

Tixdu gibil madaw iyo

Geybmaar ma xidhatoo

Ma goblamay afkeenii

Ma gaagaxday odhaahdii

Ma gallooftay heestii

Gegyigiyo dadkeenii

Carraduu ka goohoo

Gucumaale aariyo

Siduu yahay gudgude roob

Gurxanka iyo yeedhmada

Ka gariirin jiray iyo

Ma gammiintay ciiddii

 

*****

Wallee gabay mug weyn iyo

Murti  gaaxinteediyo 

Ma la hoyday geeraar

Iyo garasho waaayeel

 

*****

Wallee geed adayg iyo

Durdur aan gudhayn iyo

Halyey lagu gabbada oon

Gibidhsiga aqoon iyo

Abwaan erayaduu gano

Goonyaha dalkoo idil

Laga goosan jirayoo

Goobtii la joogaba

Guubaabadiisiyo

Xikmaddiisa gaarka ah

Gaarriye siduu yidhi

Gundhigga iyo sheekada

Lagu goyni jiray iyo

Gole laga dab qaatiyo

Godol reera deeqiyo

Ma ahaa gob iyo qodax

 

*****

Gaarriyow gobaad iyo

Nin sidaada geeddiga

Guluf iyo colaad iyo

Guri ba’ay dul joogsaday

Oo gacal wanaagiyo

Nabad soo gardaadshoo

Ka gilgishay xumaanoo

Taariikh gu’ weyn dhigay

Geeridu ma duugtee

 

 *****

Af Soomaaligaad galab

Iyo goor arooryaad

Sidii geenyo shaaximan

Goobayn taqaaniyo

Galladdii Ilaahay

Gaar kuugu deeqaan

Kugu sii galbiyayoo

Tix baan kugu gunaanaday

 

*****

 

Guullana firdawsiyo

Inuu goobta aakhiro

Guryo samo ku geeyaan

Duco kuugu guusoon

Gurmad kuugu soo diray

.....(W/t: Bashir Goth, Oct.1, 2012)

 

By Fuad Sh, (Bahda Mareegta Farshaxan)